清拆工程點做先唔會出事？由收鎖匙到拆清，一次講清楚

好多人講裝修，第一時間想到效果圖、用料、價錢。但做落才知，成單工程最易出事、又最易被低估嘅，往往係第一步：清拆。清拆做得唔好，後面水電、泥水、訂造傢俬全部要遷就，工期同價錢一齊爆。

以下由我哋自己落場做開嘅角度，將由簽完約、收鎖匙，到清拆完成嘅實際流程、要注意嘅位，一次過講清楚。

一、簽約到收鎖匙：短短幾日，其實做緊好多準備

客人簽完約，到真正收到鎖匙（交樓），一般隔 3–5 日。呢幾日唔係等，而係做準備。

一收到鎖匙，第一件事係入屋睇清楚：邊啲嘢要保留、要保護。例如鐵閘、大門唔拆，就要包好；冷氣、雪櫃、廚具、煮食爐如果客人要留，都要用透明膠紙包好。

同時開始做保護工程：由電梯一路舖中空板，一直到入屋大門口，我哋會舖得幾徹底。門口亦會長期放一塊半濕毛巾或半濕地氈，等工人出入唔會印到成條走廊都係腳印。

二、收樓前後要檢查咩？其實簽約前已經睇過

滲水、空心磚、牆身、窗、去水呢啲問題，我哋通常喺簽約前（度尺、睇樓階段）已經檢查晒。所以到收鎖匙，就等於正式開工，唔會臨門才發現大問題。

三、二手樓、新樓、公屋、居屋，做法完全唔同

• 二手樓：如果係大裝修，通常全拆重做。
• 新樓：客戶通常只改少少——香港新樓基本上乜都做好，最多係地板改地磚呢類細微位。
• 公屋（清水樓）：廁所、廚房基本配備已有，大部分唔改得。要特別注意廚房門同廁所門多數有晶片，如果唔見咗，房屋署會追究，可能要即刻搵返原本嗰隻門裝返上去。
• 居屋：基本上任你點改（當然唔會拆到結構牆）。多數客人會拆晒廁所廚房磚、坐廁重做。
  ⚠️ 近年採用 MiC（組裝合成建築法）嘅公屋／居屋，因為廚房、廁所係預製組件，改動限制多，亦較常聽到漏水嘅情況，呢點值得留意。

一句總結：公屋唔改得、居屋可改；但跟嘅工夫其實差唔多，最緊要睇客戶想要咩結果。

四、開工前，要向管理處做咩手續？

私人樓宇：管理處會畀一張裝修表格，要填客戶資料、裝修公司（承建商）資料，撳印簽名。同時要睇有冇涉及危險工程——一般裝修冇特別，但如果要換落地大玻璃窗，就要一級工程牌或更高嘅資格。

按金一般約 $5,000，開一張支票壓喺管理處。呢張票通常由業主開：一來退返畀業主方便，二來係保一個底——工程期間有機會撞爛公家嘢，要確保有錢可以扣，而裝修尾數本身一定大過 5 千。

公屋／居屋一樣要向管理處申請，表格差不多，一定要填開工同收工時間。如果工期要延，就要再向管理處提出延長。管理處亦會喺大廈當眼處貼出邊間裝修緊，提醒鄰居。

五、保護工程：做唔足唔止賠錢，仲可能唔使開工

公共位（走廊、電梯）：走廊地下一定要舖得靚、平、唔可以令人仆親——呢樣做唔足，基本上唔使開工。至於電梯，現時多數私人屋苑已經包好三邊保護。

單位內：唔郁嘅嘢（例如冷氣機）一定要包好，唔可以畀塵走入去；門框、門亦要包住，唔係好易撞花。真係撞花咗，一般請油漆師傅補油執返，業主多數都冇投訴。

如果撞爛電梯旁邊嘅瓦仔，就係用嗰筆 $5,000 按金；管理處會叫你搞返掂，佢哋驗收冇問題就冇事。

六、清拆範圍：究竟要拆到咩程度？

打廚房、廁所，一般打到去底層（差唔多見到石屎再出面一浸）已經 OK。有啲人以為要「打到見石屎」先叫乾淨，其實要打到幾深，冇一個固定標準，要睇好多唔同客人嘅要求。

地下亦一樣：打到底就唔怕舊防水層，因為我哋會重新做過防水，唔需要打到好深。最怕遇到嘅，係嗰啲「原本地下一浸底、再鋪多一浸轉上去」嘅單位。

至於拆物件（例如拆櫃、拆門），最緊要係事前同客人講清講楚。講清楚，就唔會有事；市面上好多爭拗，其實都係一開始冇講明。

七、邊啲位一定唔拆得？

一定唔可以拆嘅，係主力結構牆同橫樑。結構牆一般睇圖則（floor plan）就確認得到。涉及結構嘅改動，必須由專業人士按法例處理，唔可以靠估。

八、清拆實際點做？工序係點？

清拆師傅一到，通常會先拆晒門框、要拆嘅櫃、廁所等，揼爛晒先。之後分組：入面有人拆、出面有人即時搬嘢落樓，一路拆、一路清走，唔會停。木器搞掂，就睇有冇牆要拆；跟住用炮打牆身瓦仔（廁所、廚房）、再打地下地磚或地板。

我們用開嗰班師傅，一個三房單位擺滿雜物、連拆連清走，一般約 2 日半至 3 日搞掂。底層會擺環保斗，最後一次過勾走。

九、清拆最常「估唔到」嘅係咩？

• 地下：最常估唔到。試過舊樓拆地板，下面已經有一層磚，再拆落去仲有一浸磚（即一層地板、兩層磚）。好彩客人肯加錢，唔係就好難做。
• 廁所／舊樓：打瓦仔時，如果橫樑位有瓦仔，一炮打落去，成條石屎可能跌落——因為裡面鋼筋已經發脹生鏽。所以層樓夠舊，我哋會事先叫師傅小心。
• 趣事一則：試過拆舊傢俬，櫃入面原來有個小夾萬，師傅即刻交返畀客人。

十、清拆後，點檢查基層先交下一工序？

重點係廁所、廚房牆身打得夠唔夠徹底，同埋有冇拆漏嘢——窗台雲石檯面就係最常漏拆嘅位。我哋通常臨拆完會去現場睇一睇，趁師傅未走，有問題即刻解決，唔會留到下一工序先發現。

十一、清拆做得唔好，後果有幾大？

做得唔好要翻手，最直接就係拖工期：水電要入場、要駁臨時電、師傅要褪期，一個工序亂，後面全部亂。

如果清拆做得唔夠徹底，廚房、廁所牆身同地下擦得唔夠乾淨：

• 泥水師傅鋪磚時，牆身有高有低，磚落去就會「厚咗」→ 室內可用空間變細，英泥食沙唔夠亦唔實淨。
• 廁所廚房嘅去水喉多數埋喺地下出牆，地下如果有高有低，就會墊高 → 室內高度矮咗。

十二、點解清拆「唔會爆預算」？

清拆同運費，係現場睇過要拆幾多嘢先定，喺報價單已經逐項列明，所以基本上唔存在爆預算。唯一可能加錢嘅情況，就係頭先講嘅「地下一層地板、下底仲有兩層地磚」——量真係差好遠，客人通常都會理解，係加錢而唔係爆預算。

十三、一份好嘅清拆報價單，應該係咁

一份清楚嘅清拆報價，可以分開幾十個項目。相反，有啲公司寫得好籠統，甚至只寫一句「拆門」，上到去先臨時加價。

以一個三房單位、連舊傢俬全拆為例，正常份清拆報價最少有 2 張 A4 紙。如果你見到少過 2 張 A4 紙嘅項目，份清拆報價就有問題。

寫法要拆細：例如唔止寫「清拆大門」，而係寫「清拆大門、清拆大門門框、清走」。我們出單之後，會揸住報價單逐項同客人對，每講一項就等客人答一句「清楚明白」，先落下一項，咁就唔會有爭拗。

十四、客人最少要問清楚邊 3 樣？

常見問題 FAQ

想睇我哋實際做過嘅單位，可以瀏覽裝修工程實錄；想知訂造傢俬預算，可用AI 智能報價先估算，再約免費上門度尺覆核。更多裝修避坑問題，見避坑指南。