水電工程點做先穩陣？由夾位到谷磅，一次講清楚

清拆之後，緊接落嚟就係水電。水電係「隱蔽工程」——所有喉管、電線一鋪完就封落牆同地，之後想改，代價好大。所以呢一步做得好唔好，直接決定咗你屋企之後好唔好用、會唔會成日漏水跳掣。

以下由我哋自己落場做開嘅角度，將由清拆完成、夾位、施工、到封牆前驗收嘅實際流程同要注意嘅位，一次過講清楚。

一、水電幾時入場？同清拆、泥水點排先後？

次序好簡單：清拆 → 水電 → 泥水／防水 → 鋪磚 → 木工／傢俬 → 油漆 → 安裝。

清拆完，第一個入場嘅就係水電師傅。佢哋入場第一件事係駁好臨時電，做完通常收工；第二朝，就係最關鍵嘅一步——夾位（下面詳細講）。

有一點好多人唔知：如果客人要改煤氣錶位，就要先安排煤氣師傅做咗，水電師傅要讓一讓、之後先做返水電。呢啲次序一開始就要講清楚。

二、開工前：設計師、師傅、客人一齊現場「夾位」

水電圖、燈位圖、電線位圖，設計師一早已經同客人夾好，畫好成個平面圖。到水電師傅正式開工前，會再由設計師、水電師傅、同客人三方一齊喺現場對一次，先至開工。

呢個現場夾位，大概 2 個鐘，但就係成單水電最重要嘅 2 個鐘。會夾清楚：有幾多個電掣、做咩電制、放咩電器、燈制喺邊，尤其是熱水爐位置、浴室寶（係窗口機定天花機）、有冇二路開關，同埋用咩電器。

點解要夾到咁細？因為好似洗碗機，就要特登做多一組來去水；廚房本身仲有洗衣機（一來一去）、鋅盆（一來一去）。呢啲位一夾漏、一夾錯，之後就好大件事。溝通過程，我哋甚至會攞個隔氣樣板即場同客、師傅講解，邊啲位喺櫃內做、邊啲位喺出面做。客如果唔在場，永遠都唔會清楚。

三、電位點定？點先唔會漏？

老實講，大部分客人都唔係好清楚自己屋企有幾多電器。所以我哋會畀一張電器清單畀客人剔，佢有嗰樣剔嗰樣、旁邊填埋尺寸，話埋用咩制面度。剔完，大家就知佢真正需要幾多個電位喺邊。

最常漏嘅，係床頭叉電位；如果房夠大，床頭仲會加多個二路掣——入房喺門口開燈，瞓覺喺床頭熄天花燈，唔使起身。

其實唔係「有幾多個位、喺邊」最緊要，而係客人要真係清楚每個掣要嚟做乜：嗰個係開關掣定插電？係榨汁機定咖啡機？床頭係差電話定仲有其他用途？問得清清楚楚，最後就唔會有錯、唔會唔開心。

四、電箱同大電器：邊啲一定要獨立供電？

如果成間屋拆晒重做，基本上 99% 都會換埋個總電箱（MCB）——因為舊樓啲保險絲箱冇而家咁好；漏電斷路器（水氣掣）一向都有，大裝修多數都會順手換埋。

至於「食電」嘅大電器，例如分體冷氣、電磁爐、電熱水爐，通常都要獨立拉線、一對一，唔可以同其他電器「手拖手」串埋一齊。而家好多人做嘅，仲有將本來外露嘅冷氣機電線收埋入牆，成個觀感靚好多。

另外，而家 USB 插座、燈控、聲控、智能家居已經好普及（起碼流行咗 4 年）。呢啲嘢最緊要事前溝通清楚，因為線位完全唔同，仲要知清楚品牌同型號——我哋會上網查清楚，先做到個佈局。

五、來水、去水點做？

來水一般用銅喉（多數英國或澳洲），按供應同客人要求選用；去水一般用 PVC 硬喉，呢啲都係香港一般做法。

暗喉（收埋嘅喉管）有幾種走法：藏地下、藏牆身（俗稱「入牆」）、走天花明喉、或者走外牆。每種都有取捨：

• 藏牆／藏地：最靚，但一有滲漏就好難察覺、亦難維修。
• 走天花（明喉）：冇咁靚（可以做一個鋁蜂窩板天花遮咗佢，咁就靚仔），但好處係一漏水即刻知。
• 走外牆：管理處同意嘅話，係唔錯嘅選擇，維修最方便。好似我哋做開嘅匯景花園，煤氣喉、水喉、部分去水喉都係走外牆。

六、熱水爐點揀？

大部分香港家庭都用煤氣熱水爐。如果單位有兩個廁所，通常會喺洗面盆底加裝一個細細嘅電熱水爐，避免沖涼、廚房幾邊同時用水而「搶水」。

至於咩情況用電唔用煤氣：好多新樓根本冇預留煤氣位，一開始就係設計用電爐，咁就一定要用電。反過嚟，本身用開煤氣嘅，反而可以塞咗個窿改做電熱水爐。

七、封牆前必做：影相存檔 ＋ 水喉「谷磅」

水電係隱蔽工程，所以封英泥之前一定要做兩件事：

一、影相存檔。所有開坑位、放電位置、水喉點樣走（沿牆上又好、地下走又好），全部影晒相，再記一個手稿。到最尾，我哋會將所有相片同影片存落一隻 USB 交畀客人存底——將來你想鑽牆做吊板、驚鑽到電線，攞返隻 USB 一睇就清楚，再對返平面圖，兩者一拍埋就一定唔會錯。

二、水喉谷磅。電嘅部分，交樓前師傅已經試晒；水嘅部分，我哋會用磅錶替水喉加壓，谷足 24 至 30 個鐘，睇水壓有冇跌——冇跌，即係冇穿窿、冇漏氣、冇漏水。全程我哋會拍片畀客人存底，大家開心收貨。

八、水電報價點計？點解差價咁大？

香港一般計法：電係按「位」計（13A 一個位幾錢、其他制式又幾錢，如此類推）；來去水就一套一套計（一來一去為一套），唔係按米。

點解唔同公司差價可以好大？因為有啲公司「師傅又係老細又係電工」，甚至冇寫字樓，成本自然低；正規／大公司人手多、開支大，價錢就會高啲。唔一定要揀最平，但要清楚自己畀錢買咩。

九、水電工程要幾耐？

一個正常兩房至三房單位、日日開足工，水電大約17 日。

要留意有啲「估唔到」嘅情況：例如要連屋外走廊到水錶位嗰段水喉都換，就要打開走廊嘅磚一路做到水錶——咁時間同價錢都會加。所以排期時，我哋一般都會留多少少時間做保底，因為十個家庭有八個，做到中途都會有嘢改（例如浴室寶本來留天花機電位，後來改窗口機）。

十、客人最少要問清楚呢 4 樣

十一、開工前，客人自己要做嘅準備

最緊要係完完全全搞清楚自己有幾多款電器。我哋一早會畀張清單你，你有嗰樣剔嗰樣、填埋尺寸、講埋用咩制面——開工之前一定要交到呢張清單，之後就包冇錯。

當然啦，如果中途突然想換過第二款洗衣機（唔同尺寸），我哋都會盡量遷就；但客人一定要早早話我哋知，唔好等開咗坑先講。

常見問題 FAQ

想重溫第一步，可以睇返清拆篇；想睇我哋實際做過嘅單位，可以瀏覽裝修工程實錄；想知訂造傢俬預算，可用AI 智能報價先估算，再約免費上門度尺覆核。更多裝修避坑問題，見避坑指南。