泥水・防水點做先唔會漏水？由找平、防水到閉水測試，一次講清楚
水電完成、客人驗收簽名之後，緊接落嚟就係泥水同防水。呢一步最考功夫——尤其防水，做得差或者做錯，往往幾個月之後先爆；一漏水落樓下，賠償同返工都係惡夢。所以呢一篇，我哋用自己落場做開嘅角度，將泥水由入場到驗收嘅實際流程、防水要做幾高、閉水測試點做，逐項講清楚。
一、泥水幾時做？工序點排？
好簡單：泥水係做咗水電先至做。全屋工序排法係——水電 → 泥水 → 防水 → 鋪磚（之後先到木工／傢俬、油漆、安裝）。
而泥水師傅入場之前，水電要「交低」嘅手續係咁：水電師傅離場，我哋會將所有開坑、放線、喉管位置影晒相、存底；跟住叫客人上嚟驗清楚，睇下有冇錯位、做漏、做錯；冇問題就簽名、收第二期數，泥水師傅先至進場。呢個「影相＋簽收」嘅動作，係保護客人同公司雙方——之後封咗牆先至嚟拗，就冇意思。
二、「泥水」其實做啲咩？
好多人以為泥水只係「黐磚」，其實佢包：批盪（牆身批平）、找平（地台盪平、做硬底）、砌間牆收口、做地台、門檻位石底等等，一路做到可以鋪磚之前。
做開嘅次序大概係：首先成間屋盪平／找平晒；個廳做好，就輪到廚房、廁所，一樣整到靚仔、平滑晒；之後通常先做廁所——一般就係砌返個企缸沖涼位；跟住就做防水；試完水確認唔漏，先至鋪磚。
三、邊啲位「一定」要做防水？
講到一定要做（或者最好做）防水嘅位：
- 浴室——一定、最緊要。
- 舊樓嘅露臺。
- 鋁窗出面嘅邊（窗邊收口浸水位）。
- 冷氣機嘅石屎台（混凝土台）。
反而廚房相對少做防水——因為廚房始終唔係長期浸水嘅地方。以上就係「最最最一定要做」嗰幾位。
四、防水層點做？要做幾高？
防水層一般用品牌塗料（例如 Sika），髹落去慢慢髹，最少髹兩浸，有時三浸，重點係要覆蓋晒所有氣孔；髹完等佢乾透，先做下一步。
高度方面：一般由企缸位計，做到 1.8 米高，確保沖涼時啲花灑水彈上去，都彈唔到去冇防水嘅位置。而家好多都連四幅牆都由 1.8 米做起，咁就算有人揸住個水喉四圍沖，都比較安全。
五、閉水測試（浸水測試）點做？
閉水測試就係俗稱嘅「浸水試漏」，係防水做得好唔好嘅最後關卡。做法係：
- 油完防水、等佢乾咗，就喺浴室放水；
- 門口先做一個壆仔（擋水石壆）擋住啲水，一般放到 3 吋水深；
- 水面上放一個浮標，記低正常水位；
- 我哋一般禮拜五臨收工前放水，一路試到禮拜一早上返嚟睇——禮拜五到禮拜一，時間一定夠；
- 返到嚟，水位冇跌＝防水冇問題；跌咗＝好大機會漏水；
- 有啲公司甚至會放個閉路電視鏡頭影住個浮標，咁就冇得做假。
試水期間，有時我哋仲會帶客人落樓下單位、揭開天花板睇下，令客人更加安心（當然前提係同樓下鄰居關係 OK）。
六、防水做得唔好，會出咩事？
防水做得唔好，梗係會出事——但通常唔會即刻出事，所以先至咁易俾人偷雞。市面上點解有啲防水可以咁平？因為客人唔識，淨係睇價錢，唔明點做、又唔明用咩牌子。有啲唔用正式塗料，用古法物料（俗稱「牛奶水」），又或者師傅求其髹兩髹、上面髹得唔夠高，等於冇髹過，客人又唔識照收貨。
呢啲問題，往往要四、五個月後先浮現——因為唔係一嘢咁流落去，樓下通常仲有鋁天花遮住，到發現嘅時候，問題已經好嚴重。到時嗰啲呃人師傅，錢收晒、電話都搵唔到。
點揀防水師傅？問清楚呢 4 樣
- 用乜嘢防水塗料（牌子）。
- 做法同工序（髹幾浸、做幾高、有冇做壆、點試水）。
- 事後有冇保養。
- 公司有冇寫字樓／固定地址——收得特別平、得個電話號碼嗰啲，你要諗清楚。
七、舊樓／村屋做防水有咩特別？
舊樓、村屋嗰啲，我哋做開會先批好一層靚批盪，真真正正等佢完完全全乾透，先至做防水，咁樣效果先好。
至於「有地台嘅單位」——如果講嘅係房入面嘅地台床，一般同防水無關；防水係關廁所、露臺呢啲位。真係成間屋入面嘅地台都做防水，係好少見嘅做法；露臺就都有人做。
八、批盪、找平點做？點分做得好唔好？
如果要成個地台批過靚仔（做硬底），泥水師傅通常會帶雷射水平儀打勻成間屋，得出一條線位（我哋叫「墨線」），然後逐忽逐忽慢慢批，做好晒先攞平。
貼磚嘅時候，就會用「膠沙」貼，貼嘅途中仲要落找平器——無論係浴室牆身、廚房牆身／地下，定係客廳地下，都會用晒找平器，咁先確保唔會高低不平。以上係香港打算長住嘅地方，普遍會採用嘅做法。
題外話：有啲好平嘅泥水（地下幾千蚊、萬零蚊，當然單位細），會用一種叫「乾濕沙」嘅方法——即現場撈英泥沙再溝水，就咁查落去做地台，高低差會出現得比較多，亦比較容易空鼓。所以而家好多醒目客人，都會指定用膠沙癡（貼），價錢係會輕輕貴啲，但穩陣好多。
九、泥水最常遇到嘅「估唔到」
好多人以為泥水會有好多「估唔到」——舊磚底、夾層、暗喉、地台高低差……其實呢啲基本上唔會發生：因為夾層嗰啲一早打晒，去到現場多數已經係一個靚仔嘅地台。真正估唔到嘅，反而係客人自己買嘅磚——因為我哋唔會知個客買咗咩磚。
小故事：貼咗十件先發現「送錯磚」
試過有個客自己買磚、送上樓，師傅貼咗十件；咁啱我哋喺現場巡地盤，影咗張相畀個客睇，個客即刻十萬火急打電話嚟話「送錯咗！」。結果要即時起返晒出嚟，再等四日，個客先坐喺度親自拆開新磚逐件睇。所以有時啲客索性問我哋：「你哋有冇磚賣？」——因為由我哋揀磚，就少好多呢類風險。
十、地台、門檻、去水位有咩特別？
去到砌磚、砌瓦階段，其實大致已定局，因為一早喺平面圖就排好晒鋪磚方式（由邊度放第一塊、點樣輻射砌出去），到現場只係 double confirm 有冇問題。
- 企缸、地台去水位要做斜度去水，仲要配合地磚大細去排。
- 門檻位：一般做法係客廳做平，然後搵一塊真雲石卡落去就搞掂。
- 開放式廚房：會用同一款磚一直鋪通（而家最興開放式廚房同客廳一致高度、一路鋪通）。
- 浴室一定要做門檻——為咗慎防有人唔記得閂水喉，啲水走唔切，由門口流出走廊。
十一、完成之後點驗收？
砌完磚，通常師傅會先砌廚房、廁所。每砌完一個位或者一幅牆，日頭我哋會通知客人，夜晚一齊上去睇；客人如果冇意見、OK 就收貨，第二朝繼續做落去。
直至完完全全貼好所有地台、牆身，做埋掃口（填縫）、乾晒之後，會用半濕乾布抹乾淨個地下，再約客人上嚟、除鞋睇清楚有冇問題。冇問題就簽收，收第三期數；有問題就執（返手）。
因為防水一早就喺閉水測試嗰陣畀客人睇過，所以防水部分通常冇手尾；最後呢次驗收，主要係睇啲磚貼得好唔好——有冇唔理想、有冇空鼓。
十二、泥水／防水報價點計？報價單要寫啲咩？
香港一般計法：泥水係按「井」計——一井等於 100 呎（即 10 呎 × 10 呎）。而家每一井大約$9,000 起錶，至萬幾蚊都有，要視乎師傅手工同公司，所以不能作準。防水就按「一套」計，一個標準洗手間，一般約 $7,000–8,000。
一份好嘅泥水報價單，最少要寫齊：
- 底料用乜嘢造法（乾濕沙定硬底）、包唔包面（即表面嗰塊磚包唔包）。
- 面積。
- 防水牌子、髹到幾高。
- 仲有好多逐項要做嘅嘢：浴室企缸、廚房石屎墊台、窗台石、廚房／廁所地面嗰嚿石……全部都係泥水師傅落手做，都要寫清楚。
點解要寫到咁細？因為如果報價單寫得太籠統，到最尾好容易多張「追加單」彈出嚟——「企缸髹油收你一萬」，「廚房個石屎墊台又收你萬二」，你都冇聲出。
順帶一提兩個香港人好常見、但未必個個知嘅做法：「石屎墊台」就係喺廚房廚櫃下底先砌一個石屎台、墊高咗個地下，先放櫃落去，咁就算地下濕水，都唔會令個櫃養住水、發霉；而窗台嗰嚿雲石（窗台石）都係泥水師傅做，尤其大窗台更難搞，係一筆獨立費用。
十三、泥水＋防水要幾耐？
好難一概而論，要睇間屋大細、做幾多廚廁。當一個三房一廁一廚單位、連埋做防水、日日開足工，一般大約20 多天。要留意防水仲要預浸水測試嗰幾日（我哋一般由禮拜五試到禮拜一），所以排期時我哋都會預鬆少少。
小故事：為咗個浴缸，成隊人捏一把汗
有一次，泥水師傅都未正式入場，個客因為見浴缸特價，即刻買咗、仲送埋上樓。原來佢係喺未清拆嗰陣度到浴室大約 1 米半就信以為真——理論上，個浴缸未必放得落。結果第二朝，老闆同兩個師傅三個人夾手夾腳，啱啱好放得落；如果幅牆斜多少少，就成件都放唔入。四個人在場捏一把汗，放好之後先鬆一口氣。嗰兩個師傅飲茶時仲話：「老板，下次小心，今次放得落，下次唔知放唔放得囉。」呢單，算係最難忘、最驚險嘅一次。
常見問題 FAQ
想重溫前兩步，可以睇返清拆篇同水電篇；想睇我哋實際做過嘅單位，可以瀏覽裝修工程實錄；想知訂造傢俬預算，可用AI 智能報價先估算，再約免費上門度尺覆核。更多裝修避坑問題，見避坑指南。