木工・訂造傢俬點做？由度尺、出圖、廠房試裝到現場安裝，一次講清楚
泥水、鋪磚做完，緊接落嚟就係木工同訂造傢俬。呢一篇我哋將兩件事合併講——因為今日香港「現場木工」其實已經好少，好多嘢都改為工廠預製；真正喺現場落手嘅，來來去去都係燈槽、門同收口。至於訂造傢俬，其實由度尺、出圖、揀色板、廠房生產、試裝、上樓、安裝到執漏，每一步都有學問。我哋用自己落場做開嘅角度，逐項同你講清楚。
一、木工幾時做？同鋪磚、油漆、安裝點排？
正常泥水（即鋪磚）做完，就輪到木工。全屋工序大概係：清拆 → 水電 → 泥水／防水 → 鋪磚 → 木工／訂造傢俬 → 油漆 → 安裝收口。
不過有一樣嘢好多人唔知：訂造傢俬其實一早就已經 confirm 咗，喺廠生產緊——唔係等到鋪完磚先開始諗。所以度尺、出圖、落單呢啲動作，係要喺前期就夾好時間，先至接得上。
二、而家香港「現場木工」仲做啲咩？
講白啲，而家香港現場木工真係冇咩做，來來去去主要係燈槽同門呢兩味：
- 天花燈槽（藏燈帶、做層次嗰啲）；
- 裝門（房門）；
- 裝廁所門。
連啲門，而家都多數係大陸廠做完，運落嚟現場安裝。所以真正喺現場「釘」嘅，基本上得返個燈槽。點解會咁？因為大部分工序已經搬晒去大陸廠做——做好、運落嚟、現場安裝，又快又準。
三、度尺幾時做？最易出錯嘅位喺邊？
以一個裝修單位計，度尺嘅時機好關鍵：泥水傾好晒、現場有條「腰墨」（水平墨線）嗰陣，就要正式攞尺寸。我哋自己做開嘅習慣，係一鋪起地台就即刻「覆尺」，覆完就可以拎上大陸做。
最易出錯嘅位係斜位——即而家啲俗稱「鑽石形廳」嗰類唔規則嘅平面。不過講到底，跟返正個程序做，其實好少出錯。老闆補一句最真實嘅：大部分出錯，都係自己睇錯呎——「個心諗一條數，寫又寫咗另一條數」。所以覆尺、對數呢啲動作，寧願做多一次。
四、出圖與確認：點解要出「3D 施工圖」？
其實第一步，我哋已經會出平面圖同 3D 效果圖俾客人睇。而做緊 3D 效果期間，單位一路裝修緊；我哋會將佢整理成一套「3D 施工圖」——有立面、頂視、切面。
有咩用？就係將啲特別位置一一標晒出嚟：邊度要避嘢、避陣（避開橫陣／石屎樑）、避電制……全部寫清楚。呢套施工圖係線稿、唔係彩色——因為咁樣最清清楚楚，師傅睇圖唔會睇錯。
睇圖冇問題之後，到最後做好地台，我哋會再覆一覆尺，畀客人最後睇多一次；冇問題就簽名確認，先至開始生產。夾好呢個時間，成件事就「啱啱好」接得上。
五、色板同板材點揀？ENF 同 E1／E0 有咩分別？
我哋公司做開，一般已經用緊最頂級嘅 ENF 板材（生態板）。同其他板材最大分別係——零甲醛，真係。家裡有小朋友、長者，呢點好重要。
點解市面上仲有人用 E1／E0？你成日見到好平嗰啲傢俬，多數就係用呢啲。仲有種常見手法：先用平價板報個平價氹你落訂，跟住先慢慢同你講「要 upgrade」，一加再加。
至於色差，老實講全世界都有——因為呢批料同下一批料，多多少少都會有色差。但只要喺國際性可接受範圍之內（講緊一兩個 percent），就屬正常；嚴格嚟講，色差係冇得完全避免嘅。
六、廠房生產：點確保同圖則一致？
流程係咁：廠房收到圖紙之後，會先聯絡我哋了解一啲問題；傾清楚，就可以開工生產。
生產到咁上下——即成個櫃都釘起咗嗰陣，通常會安排老闆親自上去睇一睇，或者由廠方影相／拍片，確認成隻櫃有冇錯。有錯即刻改；冇錯就等包裝。有啲客人想睇廠，老闆都好樂意同佢一齊上。
就因為中間有呢重「睇貨」關卡，所以正常情況之下，成品好少會同圖則唔同。
七、試裝：出貨前嘅最後一關
「試裝」就係喺廠房，將成個櫃釘起佢、駁好晒電（例如燈帶）先，確認：① 尺寸、組裝冇問題；② 燈帶、電線通電正常；③ 櫃門、五金開合順暢。試裝妥當，先至分件、包裝、安排上樓。
呢啲試裝相，我哋網站「裝修工程實錄」入面嘅工序 05「廠房預製・試裝檢查」就有好多，有興趣嘅客人可以自己睇。
八、上樓：點解決「入唔到屋」？
以前上樓最麻煩：隨時都要臨場分件——有陣時大件得滯入唔到電梯／樓梯，轉彎又會揩到牆、撞花。分幾件、邊度分、點樣分，以前都要自己畫、自己諗。
而家好好多：只要事先將電梯嗰個尺寸、走廊出面嗰個尺寸交俾廠，工廠就識得點樣分拆。我哋連「畫分件圖」呢步都慳返——交尺寸就得。
九、現場安裝：一日裝得完嗎？要幾多人？
首先一個觀念：裝修單位唔會一次過將所有傢俬落晒嚟。正常做法係先落廚房櫃、廁所櫃——因為呢兩組櫃就算裝起咗，都仲要等嗰塊檯面石。裝好呢兩部分、等到石，先至安排落全屋其餘傢俬。
點解唔一次過落？因為三房一廳嘅全屋傢俬一次過上嚟，會塞爆成間屋，根本冇位郁。至於時間：
- 一日絕對冇可能裝得晒。
- 正常一間屋（房連廳），大約要 3–4 日。
- 人手方面：一般 3 個人——一個師傅加兩個幫手。
三個師傅裡面，當有邊個得閒，就會去做包裝——將拆出嚟嘅紙皮紮好、疊好，令現場冇咁凌亂，之後亦方便清走。呢啲睇落係小事，但做足，成間屋裝嘅時候都舒服好多。
十、現場收口：門框、燈槽、地腳線點做？
收口位最緊要嘅一句：成個設計就要預留定。例如而家最興嘅收口邊——留返個位到時做起，油漆收邊就會好靚。
做法通常係做一個凹位，約 30mm 左右。如果天花或者牆身有少少斜，就可以cut 少少去就；之後油漆師傅收埋邊，就好靚。當然，呢啲都係成本——做得越靚、收口越貼，功夫同錢都自然多啲。
十一、執漏：安裝完仲有咩手尾？
留意一樣嘢：安裝完其實仲未交樓，之後仲要等油漆師傅做最後一浸油漆。油漆師傅會將櫃邊收靚，同埋檢查所有門框有冇花（房門、大門呢啲），有花就執埋。執好晒，就差不多可以約客人上嚟交貨。
講到「執漏」，其實好多時大家都唔覺——例如隻門少少歪，全世界冇人發覺嗰啲，先叫做執漏。我哋通常交貨前已經自己檢查過一次；以老闆自己做嘅工程計，執漏唔會多過十樣八樣，已經算好少。因為一隻門調一調叫一樣、另一隻門攝條叫第二樣，加加埋埋其實唔會多過十項，通常都係較門、攝下少少、或者可能少咗粒螺絲咁樣。
十二、驗收：客人要試邊幾樣先算收貨？
訂造傢俬驗收三點：
- 有冇崩、花、爛——表面同邊位都要睇。
- 有冇同之前描述嘅五金一樣——門鉸、路軌、拉手要對得返。
- 檢查材料是否一致——板材、色板同落單時係咪同一款。
以上三樣對得上，基本上就可以安心收貨。
十三、報價點計？點解差價咁大？
好多人問：同樣一組櫃，點解唔同公司報價可以差幾倍？原因之一係——而家好多人鍾意「睇個細價錢先」，揀最平嗰個；但其實到最尾埋單，往往仲貴過本來報得貴嗰間。
點解會咁？有啲公司嘅手法係：
- 先報 E1 板——個價梗係靚；
- 客人唔鍾意，就話升級加少少；
- 客人再聽人講 ENF 最好，又要再加；
- 到呢個時候，客人已經畀咗訂金，又話想改五金、改靚啲……改下改下，就變成咁貴。
一份好嘅訂造傢俬報價單，最少要寫清楚：
- 用咩五金（牌子、型號）。
- 用咩材料（例如 ENF 生態板）。
- 包啲咩、唔包啲咩。
- 訂造要幾耐（交期）。
- 張報價單畀唔畀客人攞走——如果連張報價單都唔畀你攞走，就要當心，好可能係收埋咗啲嘢。
寫得越清楚，之後就越少「追加單」突然彈出嚟。
十四、訂造傢俬要幾耐？
正常而家5 至 5 個半星期就應該安裝好。分別係：
- 如果冇乜特別嘢、唔係好多嘢（例如只訂一兩隻櫃），一般 4–5 星期；
- 如果係成個裝修單位，就一定要預多啲——約 5 至 5 個半星期。
小故事：一件唔見咗嘅組件
最難忘嘅通常都係以前發生嘅事。試過成間屋嘅傢俬都完美安裝好晒，但單單獨獨唔見咗一件組件，就係嗰一件，搞到成隻櫃都裝唔到。以以前嘅做法，要重新度返嗰件組件再做，好頭痛。記得有一次，一個衣櫃本來八件組件，其中一件唔見咗——我哋頭都痛埋，踱嚟踱去、度嚟度去搵，仲諗住索性度返尺寸做返嗰件。點知第二日，發現件組件喺第二間屋，即刻攞返去，真係有驚無險。而家同一個情況就唔使驚：就算唔見咗邊一件，工廠都可以即刻生產返出嚟。因為以前係手作仔年代，而家係電腦年代——由計劃點開料，到開料、釘裝，大部分都係電腦生產，準確好多。
常見問題 FAQ
想重溫前面幾步，可以睇返清拆篇、水電篇同泥水・防水篇；想睇訂造傢俬整體流程，可睇訂造傢俬流程全攻略；想睇我哋實際做過嘅單位，可以瀏覽裝修工程實錄；想知訂造傢俬預算，可用AI 智能報價先估算，再約免費上門度尺覆核。更多裝修避坑問題，見避坑指南。